ஊடகங்களின் கேவலங்கள்.

இந்த கேவலத்தை எத்தனை பேர் புரிந்து வைத்துள்ளீர்கள்?

 ///The medias are also responsible for turning scoundrels into ”heroes”.Not only that they also ensure that such so-called heroes come to enjoy a huge fan following. ///

ஒரு சினிமா நடிகனுக்கு உடல் நலக்குறைவு என்றால், அவன் வாந்தி எடுத்தால் உங்களுக்கு ஏன் இத்தனை ஆர்பாட்டம்? ஒரு சினிமா நடிகன் ஒரு மாநிலத்தின் முதலமைச்சராக உள்ள ஒருவரை சந்திக்கிறான் என்றால் நீங்கள் எல்லாம் ஏன் இப்படி கூப்பாடு போடுகிறீர்கள்? இவர்களைத்தவிர நாட்டில் வெறும் ஒன்றுமே நிகழ்வுகள் இல்லையா? ஒரு நடிகன் தன் ரசிகர் மன்றத்தை கலைதுவிட்டதாக கூறினால் அது மகா பெரிய செய்தி.சினிமாகாரர்கள் என்ன விண்ணில் இருந்து இறங்கிவந்த தேவ தூதர்களா? அவர்கள் மனித பிறவிகள் இல்லையா?  ஆணும் பெண்ணும் கலவியில் இணைந்து இந்த சினிமா காரர்களை பிள்ளைகளாக பெற்றுஎடுக்க வில்லையா? இவர்கள் எல்லாம் என்ன சுயம்புவா? இவர்கள் சாகா வரம் பெற்றுவந்த சிரஞ்சீவிகளா? ஒரு குறிப்பிட்ட நடிகனின் திரைப்படம் வெளிவர போகிறது என்றால் அதற்கு முன்பாகவே திட்டமிட்டு வித விதமான பரபரப்பு செய்திகளை வெளியிட்டு அந்த நடிகனை உச்சந்தலையில் வைத்து ஆடுவது ஏன்? காசு வரும் என்றால் எதையும் செய்வீர்களா? வடக்கில் ஆங்கில தினசரிகளும்,தொலைக்காட்சிகளும் மக்களுக்கு செய்யும் அதே கேடு கெட்ட வியாபார யுக்திகளை அப்படியே இந்த தெற்கு பகுதி ஊடகங்களும் பத்திரிகையும், தொலைக்காட்சிகளும் கொஞ்சமாம் மாறாமல் காப்பி அடித்து காசாக்கி மக்களை சுரண்டி பிழைகின்றீகளே ! இதில் தாங்கவொணாத பெருமைவேறு உங்களுக்கு!  ஹைடெக் சாமியார்களையும், ஹைடெக் விபசாரிகளையும் கொண்டாடி அவர்களை வளர்த்துவிடும் அனைத்து பத்திரிக்கை, தொலைகாட்சி ஊடங்களே! நீங்கள் மக்களுக்கு என்ன தருகிறீர்கள் என்பதில் கவனம் வேண்டாமா? உங்கள் சரக்கை அவர்களிடம் காசுக்கு விற்கும் நீங்கள், அவர்கள் உங்கள் சரக்கை என்றுமே வாங்கி அவைகளுக்கு மட்டும் அடிமையாக வேண்டும் என்ற எண்ணம் இன்றி வேறு நல்ல நோக்கம் உண்டா உங்களுக்கு? ஒரு திரைப்படம் வெளிவருகிறது என்றால் சில தினங்களுக்கு முன்பு அந்த படத்தின் போஸ்டர்கள் அச்சடிக்கப்பட்டு விளம்பரங்களாக வருவது இயல்பு. ஆனால் இப்போது வரும் படங்களுக்கு விளம்பர போஸ்டர் வெளியிடுவதே ஏதோ ஒரு நாட்டின் தேசிய விழா போல அல்லவா நடத்துகிறீர்கள்? இது வியாபார யுக்தியாம். பிளாக் எழுபவர்களும் ஒன்றும் சளைத்தவர்கள் அல்ல. பத்திரிக்கை,தொலைக்காட்சிகளின் அதே சின்னத்தனம்,கேவலம்  இவர்களிடமும் உண்டு. வரிந்து வரிந்து சினிமாகாரர்களை பற்றி போற்றி எழுதி எழுதி அவர்களுக்கு " கூஜா " தூக்கும் அல்பங்களும் இங்கு நிறைய இருக்கிறர்கள். சினிமாவை ரசிப்பதுடன் நிறுத்திக்கொள்ள இந்த அறிவற்றவர்களுக்கு யார் கற்றுத்தருவது?

இன்று மதியம் செய்திகளுக்காக சேனல் மாற்றும் போது சன் டி,வி. யில் எதேச்சையாக ஒரு நிகழ்ச்சி பார்க்க நேர்ந்தது. அட்சய திருதியை என்ற ஒரு புது மாதிரி வியாபார தந்திரம் பற்றியது. உண்மையில் அது ஒரு சமையல் நிகழ்ச்சியாம். அந்த சமையல் காரர் தான் செய்துகாட்டும் செயல் முறைகளுக்கு இந்த முறை தேர்ந்தெடுத்தது  ஒரு புது கோவில். சாமி சன்னதிக்கு முன்னாள் அவர் செய்யும் பதார்த்தத்தின் பெயர் என்ன தெரியுமா? 

குபேர லட்டு 

அந்தந்த பகுதிகளில் அவரவர்களின் செயல் முறைகள் இருக்கும். தின்பண்டங்களின் வகையும், முறையும் சற்று மாறுபடும் என்பது அனைவருக்கும் தெரியும்தானே. ஆனால் ஒரு வியாபார தந்திரமாக இந்த தங்கம் விற்பவர்களும், டீ. வி . மீடியாக்களும் செய்யும் தகிடு தத்தங்களை தில்லு முல்லுகளை எப்படி மக்களை சென்று அடையும் வண்ணம் இந்த புது வகை உணவு முறைகளையும் கூட தங்களின் வியாபார யுக்தியாக யோசிக்கிறார்கள் பாருங்கள்!

குஞ்சா லாடு, கோதுமை மா லட்டு, ரவா லட்டு, பயந்தம் மா லட்டு என நமக்கு அநேக லட்டு வகைகள் தெரியும். உங்களில் எத்தனை பேர் இதுவரை இந்த குபேர லட்டுவை அறிந்திருப்பீர்கள்? புதிதாக உண்டாக்கப்பட்ட அந்தக்கோவிலின் உள்ளே ஒரு சந்நிதியில் அலங்கரிக்கப்பட்ட குபேரன், லட்சிமி சிலைகள். ஆண்களும் பெண்களும், சுடிதார் கண்மணிகளும், ஜீன்ஸ் டீ ஷர்ட் இளசுகளும் கிழவர்களும், கிழவிகளும் வந்து பய பக்தியுடன் வணங்கி செல்கின்றனர். அந்த சந்நிதிக்கு முன்னாள் இந்த குபேர லட்டு சமையல் காரர் தன் கடையை விரித்து ,குபேர லட்டு செய்முறையை மக்களுக்கு சொல்லித்தந்து அனைவரையும் குபேரர்களாக ஆக்கும் வழிமுறைகளை வீடியோ கேமிராவில் பதிவுசெய்கின்றனர். அங்கு வந்த அத்தனை பெண்மணிகளும் லட்டு உருட்டிதர அவருக்கு உதவுகின்றனர். ஒரு மேஜிக் நிபுணர்போல அந்த சமையல் காரர் அங்கு பெருங்கூட்டமாக அமர்ந்துள்ள பக்த கோடிகளை மயக்குகிறார். அத்தனை பேர்களின் கண்ணும் மனமும் இவரின் பக்கமே. கேஸ் ஸ்டவ் மற்றும் அணைத்து வித பொருட்களுடன் அங்கெ கடை விரித்து செய்முறை விளக்கம் தருகிறாராம். இதுவே நாம் நம் விருப்படி எதுவும் செய்தால் இழுக்காகிவிடும்.கோவில் தர்மத்துக்கு ஆகாதாம்.ஆகம விதிப்படி அப்படி நடக்க கூடாது என்றெல்லாம் பக்க பக்கமாக விலாசிதல்லுவார்கள் இந்த ஆஷாடபூதிகள் எல்லோரும்.

• ஒரு மதத்தின் (வீணாய் போன) நம்பிக்கை 

• வழிபாட்டு முறை

• சாமியின் முன்னாள் நிகழ்வதை அப்படியே ஏற்று வாழ்வதற்கு பழக்கி விடப்பட்ட மக்கள் கூட்டம்

• தங்க நகைகள் விற்கும் கேரளாக்காரர்களின் வியாபார தந்திரம் 

• புது சமையல் முறைகள் என்ற லேபில்

• டி.வி. போன்ற மீடியாகளின் மோகம், தாக்கம்

• அனைத்திலும் எப்படி கல்லா கட்டுவது என்ற நோக்கம் கொண்ட ஆன்மீக வாதிகள்

•  புது புது கோவில் உண்டாக்கிய பக்தி வியாபாரிகள் கூட்டம் .

அட்சய திருதியை என்பது குபேர சம்பத்து உடையதாம் அன்று தங்க நகைகள் வாங்கினாலோ, குபேர லட்டு பண்ணி தின்றாலோ நமக்கு வீட்டில் தங்கமும், பணமும், செல்வமும் குவிந்துவிடுமாம்.பொய்யும் புனைசுருட்டும், கட்டுக்கதையும் இவர்களின் வயிற்று பிழைப்பு  என்றாகிவிட்டது.குபேர லட்டு பண்ணி தின்னுங்கள், குபேரர்களாக ஆகுங்கள்!